Dy denoncime të pazakonta kanë mbërritur në redaksinë e emisionit “Tak Fak” në News24. Dy qytetarë, njëri që banon prej vitesh në Gjermani dhe një tjetër që jeton në Shqipëri, mendojnë se kanë rënë pre e një përndjekje, shumë të ndryshme nga ajo klasike, siç bëhej dikur, këmba këmbës.
Ata thonë se përndjekja bëhet me anë të mikroçipave që u janë vendosur në trup, por nuk dihet se nga kush. Madje as ata vetë nuk e dinë, ashtu siç nuk dinë qëllimin përse janë ata të përzgjedhurit.
“Jam Enveri… Kam 35 çipa në trup. I kam poshtë gjoksit. Kam lodhje. Mi kanë futur te biznesi. Kërkoj sensibilizm, uroj që të mos i ndodhi dikujt tjetër si unë”, thotë ai.
Ndërsa një tjetër denoncuese, Marsela Rupi, thotë se e përgjojnë dhe në fund të 2019 e ndjente se monitorohej.
“Më kanë vendosur përgjues në dhëmballë. Kanë qëllim të më kontrollojnë se ku jam. Nuk ma marrin përsipër dentistët ta heqin mikroçipin. Jam e sigurtë që shumë njerëz e dinë por nuk flasin. Dyshoj te individë, por jo te institucione. Dhe kjo është shumë shqetësiuese….”, thote ajo.
Në lidhje me pretendimin e denoncuesve, gazetari i “Tak-Fak”, intervistoi Alfred Cakon, një personazh kontrovers për publikun shqiptar.
Cako beson se mikroçipat vendosen te njerëz të veçantë, në mënyrë që të survejohen gjatë gjithë kohës, por personat nuk e dinë që kanë një të tillë në trupin e tyre.
“Çipat komandojnë njerëzit. I komandojnë dhe i torturojnë, ua vendosin të dyshuarve, kujtdo. Njerëzit nuk e dinë ku vendosen. Pershembull në dhëmballë”, tha ai.
Ndërkohë psikiatri Sadik Lala, i pyetur nëse janë këto ide konspirative apo probleme të shëndetit mendor, shprehet se: Ky është një çrregullim delusional. Persona të tillë sillen normal. Janë të bindur se diçka ka ndodhur me ta. Duhet të ketë një motiv për ta instaluar.
