Irani vijon sulmet me raketa ndaj Izraelit, pasi ky i fundit kreu një sulm ndaj drejtuesve të ushtrisë iraniane të premten e 13 qershorit.
Të paktën tetë persona kanë humbur jetën dhe dhjetëra të tjerë janë plagosur pas një serie sulmesh që goditën një pallat banimi në Bat Yam, pranë Tel Avivit, dhe një shtëpi në qytetin verior Tamra, ndërsande vijojnë kërkimet për rreth 20 persona të zhdukur në Bat Yam.
Presidenti i Izraelit, Isaac Herzog, shprehu dhimbjen e tij për izraelitët që u vranë nga sulmet raketore iraniane gjatë natës, duke e përshkruar mëngjesin si “shumë të trishtueshëm dhe të vështirë”.
“Vëllezërit dhe motrat tona u vranë dhe plagosën mbrëmë nga sulme kriminale iraniane ndaj popullsisë civile në Bat Yam, Tamra dhe komunitete të tjera. Hebrenj dhe arabë, qytetarë dhe emigrantë, përfshirë fëmijë, të moshuar, gra dhe burra,” shkroi ai në një postim në rrjetin social X.
“Ndjej dhimbjen e thellë të familjeve dhe pikëllimin për humbjen e tmerrshme. Lutem për shërimin e të plagosurve dhe gjetjen e të zhdukurve. Do të vajtojmë së bashku. Do ta kapërcejmë këtë së bashku,” shtoi presidenti Herzog.
