Kupa e Botës për Klube fillon nga 15 qershori në Shtetet e Bashkuara të Amerikës. Turneu i ri i FIFA-s mbledh bashkë klubet më në zë të botës, në një turne me skemë të njëjtë si Botërori.
Sipas një parashikimi të bërë nga një superkompjuter i avancuar i Inteligjencës Artificiale, finalja e Kupës së Botës për Klube që do të mbahet në korrik do të vendos përballë dy gjigantët evropianë, Real Madridin dhe Paris Saint Germainin (PSG).
Kupa e Botës për Klube do të startojë këtë fundjavë, me ndeshjen e parë mes Inter Miamit dhe Al-Ahly dhe do të zhvillohet deri më 13 korrik, kur do të luhet finalja e madhe. Ky turne do të jetë më i madh se kurrë, pasi për herë të parë do të ketë 32 skuadra që do të garojnë për titullin e kampionit të botës.
Parashikimi i finales dhe fitorja e Real Madridit
Superkompjuteri ka parashikuar se finalja e Kupës së Botës për Klube do të jetë një përballje mes fituesit të Champions League, Paris Saint Germain dhe Real Madridit, ekipi më i trofeshëm në historinë e futbollit evropian.
Në këtë përballje të mundshme, Real Madrid pritet të fitojë titullin sipas superkompjuterit, duke mundur PSG-në me rezultatin 3-2. Kylian Mbappé pritet të shënojë dy gola për Real Madrid dhe Vinicius Junior të tretin. Nga ana tjetër Ousmane Dembélé dhe Fabian Ruiz do të kontribuojnë për ekipin francez.
Nëse ky parashikim bëhet realitet, Real Madrid do të shpallet kampion i Botës dhe do të marrë një shpërblim financiar të jashtëzakonshëm prej 150 milionë dollarësh, si dhe do të mbajë stemën e Kampionit të Botës në fanellë.
