Një qytetare ka ngritur një ankesë të fortë për gjendjen e rrezikshme të autostradës Tiranë-Durrës, mëngjesin e sotëm, rreth orës 09:40.
Sipas saj, rruga ishte mbuluar nga një shtresë vaji, që kishte bërë asfaltin jashtëzakonisht të rrëshqitshëm. Teksa ishte me vajzën e saj të vogël, ajo thotë se për pak u rrezikua pasi makinat nga shtresa e vajit kryenin devijime që mund të rezultonin fatale.
Ajo tha se mbi 100 makina të tjera, rrëshqisnin nëpër rrugë në përpjekje për të qëndruar në korsitë e tyre, duke u përballur me të njëjtin rrezik. Asnjë paralajmërim, asnjë sinjalizim për rrezikun, asnjë ndërhyrje nga autoritetet për të pastruar rrugën apo për të vendosur një trekëndësh sigurie. Vaji i derdhur në një nga rrugët më të frekuentuara të vendit ishte kthyer në kërcënim për jetën e qindra qytetarëve.
Ajo ngre pyetjen thelbësore: Ku është shteti në këtë situatë? Ku janë institucionet që duhet të garantojnë sigurinë në rrugë? A është shteti vetëm për të vënë gjoba, ndërsa kur rrezikohen jetë njerëzish nuk shihet asnjë ndërhyrje? Kjo ngjarje kërkon reagim të menjëhershëm dhe mbajtje përgjegjësie për neglizhencën kriminale që mund të kishte përfunduar në tragjedi.
“Ankesssss shume e madhe. Sot me date 13 ora 9e 40 Autostrada Tiranë-Durrës eshte ne kte gjendje po lija vajzen time jetime munda te menaxhoja situaten dhe shpetova ca jan kto rruge ku eshte ky shtet jo vetem une ka mbi 100 makina qe po perdridhen ne kte rruge sa kam qen ktu. Edhe un po humbisja jeten nuk ka shtet te merrte mas ta pastronte ose te vendoste trekendeshin qe ka rrezik. Apo shteti esht vetem per gjoba se per tjeter gje jo perdersa ishte autostrada me ate gjendje”, shkruan qytetarja ne denoncimin per JOQ.
