Ish-kandidati i Partisë Socialiste për deputet, Halit Valteri është paraqitur ditën e sotme në Prokurorinë e Posaçme.
U bë me dije se Valteri është thirrur në SPAK për të dëshmuar në procesin ndaj Plarent Dervishit dhe Julian Meces, për atentatin ndaj ish-prokurorit Arjan Ndoja.
Thirrja e tij në SPAK vjen pasi në atë kohë Valteri ka bërë disa deklarata dhe ka publikuar disa pamje.
Ngjarja ndodhi në nëntor të vitit 2019 pranë Shkozetit në Durrës, ku mbetën të plagosur Ndoja dhe shoferi i tij Andi Maloku (i cili ndërroi jetë pak ditë më vonë).
Valteri, në kohën kur ndodhi atentati, bëri disa deklarata publike, si dhe publikoi pamje që, sipas tij, nxirrnin në pah detaje të rëndësishme për hetimin e atentatit.
Videon, ish-deputeti e publikoi fillimisht në seancën plenare në parlament më 18 qershor 2020, teksa ua prezantoi deputetëve me anë të një tablete dhe tha se pamjet e plota i ka dërguar në polici.
Në pamje, Valteri tha se duken qartazi dy autorë të angazhuar për atentatin ndaj ish-prokurorit të Durrësit, Arjan Ndoja.
Në atë seancë plenare, Valteri replikoi me ish-ministrin e Brendshëm, Sandër Lleshaj dhe kryeministrin Edi Rama.
