Sporting i Lisbonës ka konfirmuar se ka marrë një ofertë zyrtare nga klubi anglez Arsenal për sulmuesin Viktor Gyokeres, por kjo ofertë është refuzuar nga drejtuesit e skuadrës portugeze.
Oferta e paraqitur nga londinezët, që mund të arrinte në rreth 65 milionë euro me variabla, nuk ka arritur në nivelin e kërkuar nga Sportingu, i cili ka vendosur një çmim referencë prej 70 milionë eurosh (60 milionë euro plus 10 milionë variabla).
Pas takimit mes Hasan Çetinkaya, agjentit të Gyokeres, dhe drejtuesve të Arsenalit, klubi anglez ka dorëzuar një propozim formal, i cili sipas burimeve që kanë raportuar mediet portugeze, është rreth 55 milionë euro plus 10 milionë euro variabla.
Megjithatë, kjo shifër është konsideruar e ulët nga Sportingu, që ka refuzuar menjëherë ofertën. Arsenali nuk ka ndërmend të dorëzohet dhe pritet të përpiqet të rrisë ofertën në ditët e ardhshme për të bindur klubin portugez.
Megjithatë, është e qartë se negociatat do të jenë të vështira, pasi Sportingu qëndron i vendosur në kërkesat e veta.
Ndërkohë, edhe klubet e tjera si Manchester United dhe Juventus po ndjekin me kujdes situatën dhe nuk kanë hequr dorë nga dëshira për të marrë shërbimet e sulmuesit suedez.
Nëse negociatat me Arsenalin nuk përfundojnë me sukses, klubi anglez mund të ndryshojë objektivin dhe të përqendrohet te sulmuesi i Leipzig-ut, Sesko, që gjithashtu është në listën e dëshirave të tyre për sezonin e ardhshëm.
Ky është vetëm raundi i parë i bisedimeve dhe në ditët në vijim priten zhvillime të reja në këtë tratativë që mund të ndryshojnë shumë gjëra në tregun e transferimeve.
