Një qytetar nga Tirana, tregon në emisionin “Stop” në Tv Klan se ka një problem me një çështje pronësie për një pronë të gjyshit të ndjerë Koço Xhani, të blerë në vitin 2005 në zonën e ish-restorant Durrësit në kryeqytet.
Por ish-qiraxhiu, Fatos Rustemi, pretendon të bëhet pronar brenda shpërfaqjes së pronës në fjalë. Në vitin 2009 Koço Xhani ndërroi jetë dhe trashëgimtarët bënë çeljen e trashëgimisë. Në këtë pikë, ai që kishte marrë pronën me qira, Fatos Rustemi, nisi pretendimet për 50 m2 brenda pronës së të ndjerit prej 308 metrash katrorë.
Kur dorëzoi kopjen e çelësit, qytetari pa se qiraxhiu kishte ndërhyrë në shpërfaqjen e pronës. Ai thotë, se ASHK, nuk e ka regjistruar pronën në emër të trashëgimtarëve edhe pse ata janë aplikuesit e parë, akt ky i ndikuar nga pala tjetër.
Në këto kushte, qytetari shkon në polici e prokurori, por kjo e fundit e pushoi çështjen.
Brenda pronës së marrë me qira, ndërton 50 m2 dhe kërkon ta legalizojë
Pretendimet e qytetarit denoncues, lidhur me pronën në zonën e “restorant Durrësit”, emisioni “Stop” në Tv Klan i verifikoi në terren me grupin e xhirimit.
Në vend duket objekti dhe ndryshimet, që i janë bërë murit me kartonxhez. Për pronën, trashëgimtarët paguajnë taksat duke provuar edhe një herë, se objekti është i tyre dhe jo i zaptuesit Fatos Rustemi.
Për konfliktin, gazetarja komunikon edhe me ish-qiramarrësin Fatos Rustemi, i cili ngatërrohet, duke thënë se aplikimin e ka bërë në vitin 2006, ndërkohë që shkresa e prokurorisë është e 2022-shit.
“Stop” i drejtohet ASHK-së qendrore, që ky rast të zgjidhet dhe pas ndërhyrjes së “Stop”, nis procedura. Specialistët shkojnë për të bërë matjet dhe për t’i dhënë zgjidhje situatës./ Stop- Tv Klan
