Partizani ka zyrtarizuar afrimin e Vusal Isgandarli, një emër i njohur për tifozët e Superiores, që spikati me paraqitjet e tij tek Egnatia.
Sulmuesi nga Azerbajxhani ka firmosur një kontratë njëvjeçare me “Demat”, me mundësi rinovimi nga ana e klubit edhe për një tjetër sezon.
29-vjeçari vjen si afrimi i dytë zyrtar i Partizanit këtë merkato, pas rikthimit të Xhuliano Skukës, teksa të kuqtë po punojnë për të ndërtuar një skuadër ambicioze për sezonin e ri në Superiore dhe arenën ndërkombëtare.
Isgandarli ishte së fundmi pjesë e klubit Boluspor në Turqi dhe do të jetë formalisht pjesë e Partizanit prej datës 1 korrik, kur kontrata me klubin turk përfundon. Futbollisti i është bashkuar tashmë ekipit në stërvitje me lejen zyrtare të Bolusporit.
Njoftimi zyrtar i klubit:
“Skuadra vijon me intensitet përgatitjet për sfidat e UEFA Conference League nën drejtimin e trajnerit Skënder Gega. Gjatë seancës së radhës në kompleksin ‘Partizani’ është bashkuar edhe futbollisti Vusal Isgandarli, me autorizimin e klubit të tij aktual, Boluspor.
Kontrata me FK Partizanin hyn në fuqi më 1 korrik 2025 dhe është e vlefshme për një sezon, me opsion rinovimi automatik nga klubi për një vit tjetër.”
Me këtë lëvizje, Partizani konfirmon ambiciet për të rikthyer lojtarë të spikatur në kampionat, me synimin për të qenë konkurrues si në Superligë, ashtu edhe në Europë.
