Forcat Operacionale të Policisë së Shtetit kanë arrestuar një person të shpallur në kërkim ndërkombëtar nga autoritetet italiane.
Në kuadër të operacionit të koduar “Operacionalja 47” është vënë në pranga shtetasi Zamir Halili, 50 vjeç, i cili është kapur në Elbasan, pasi rezulton i dënuar me 7 vjet burgim në Itali për krime kundër personit dhe krime seksuale.
“Gjykata e Sienas, Itali, në vitin 2014, e ka dënuar me 7 vjet burgim, për plagosje, dhunë në familje dhe marrëdhënie seksuale me dhunë. Nga ky dënim atij i kanë mbetur për të vuajtur rreth 6 vjet e 9 muaj burgim.” – thuhet në njoftimin e autoriteteve.
Policia thotë se Interpol Tirana po bashkëpunon me Interpol Romën për të finalizuar procedurën e ekstradimit të 50-vjeçarit, në Itali.
