Një ngjarje tragjike ka tronditur botën e automobilizmit në prag të edicionit të 81-të të Rally-t të Polonisë. Piloti i ri italian, Matteo Doretto, vetëm 21 vjeç, ka humbur jetën pas një aksidenti të rëndë që ndodhi gjatë testimeve në zonën e Elganowo-s.
Sipas mediave polake dhe njoftimeve zyrtare nga Grzegorz Różański, zëdhënës i shërbimit zjarrfikës të qytetit Olsztyn, automjeti Peugeot 208 Rally4 me të cilin garonin Doretto dhe bashkëpiloti i tij, Samuele Pellegrino, ka dalë nga rruga dhe është përplasur me një pemë.
Goditja ka qenë shumë e fortë dhe trupat e emergjencës kanë punuar për një kohë të gjatë për të nxjerrë Dorettin nga makina. Fatkeqësisht, ai ndërroi jetë në vendngjarje.
Matteo Doretto ishte një nga talentët më premtues të garave me makina në Itali, shpallur kampion i kategorisë Junior në vitin 2024. Bashkëpiloti i tij, Pellegrino, arriti të dalë vetë nga makina dhe është dërguar në spital për kontrolle të mëtejshme, megjithëse ndodhet jashtë rrezikut për jetën.
Ngjarja ka shkaktuar trishtim dhe reagime të shumta në komunitetin ndërkombëtar të automobilizmit, duke hedhur një hije zie mbi një nga garat më të rëndësishme të sezonit.
