Komisioni i Sanksioneve dhe Ankesave (KAS) ka vendos për hapjen e kutive dhe rinumërimin e votave në Qarkun e Fierit, si për partitë, ashtu edhe për kandidatët.
Vendimi u mor me votat e dy anëtarëve të PD-së në KAS, Ledio Braho dhe Elvis Cefa, ku do të hapen kutitë për të 587 Qendrat e Votimit në atë qark.
Kërkesa për rinumërimin e kutive në Fier u paraqit nga koalicioni “Nisma Shqipëria Bëhet”, dhe u mbështet edhe nga koalicioni opozitar “Partia Demokratike – Aleanca për Shqipërinë e Mirë (PD-ASHM)”.
Rinumërimi pritet të nisë në ditët në vijim në ambientet e përcaktuara nga Komisioni Qendror i Zgjedhjeve dhe do të mbikëqyret nga përfaqësues të partive politike.
Më herët, KAS ka vendosur për rinumërimin e plotë të votave edhe në Qarkun e Tiranës, si për partitë, ashtu edhe për kandidatët.
