Rastet e mashtrimit në Shqipëri sa vijnë e po shtohen. Të shumtë janë qytatarët që denoncojnë probleme të tilla në redaksinë e emisionit “Piranjat”. Përshembull, Eljoni 40 vjeçar me banim në Angli ndjehet i mashtruar nga Denisi, daja i bashkëshortes së tij dhe nga arkitekti me të cilin ky i fundit ka bashkëpunuar.
“Deshëm me ndërtu një shtëpi të re. Në kohën kur e kemi blerë, nuk është regjistru gjithë toka që t’ia kalonte babës tim. Thjesht ka pas 250 metra katror baba im me certifikatë në hipotekë. 250 ishte pa regjistru. Komunikova me mikun tim Denis Spaho, edhe i kërkova të më gjejë një arkitekt. Ai më tha kam një shokun tim, quhet Erion Turku. Na bëri nja dy-tre arkitektura, e zgjodhëm ne dhe na kërkoi 3200 euro si paradhënie.
Thamë, okej, do t’i japim, se gjithmonë futëm mikun tonë Denis Spaho në këtë mes për mirëbesim. Lekët i janë dhënë Denisit, mikut tim, në prezencën e arkitektit Erion Turkut. Pastaj pretendonte së bashku me Denisin se duheshin paguar taksat në shtet për leje ndërtimi dhe ne i dërgonim para herë pas here. Në total i janë dhënë 8 mijë euro. Faza e parë është paradhënie 3200 euro. Faza e dytë është 2 milion e 780 për taksat në shtet. Faza e tretë është 3800 euro për regjistrimin e pronës së mbetur.”
Edhe pse Eljoni dërgonte herë pas here para për pagesat e taksave, që pretendoheshin nga dy bashkëpunëtorët, këta të fundit nuk ia treguan kurrë faturat.
“Denisi na tha: prit, do shkoj, do i marri tek studio, edhe do t’i çoj. Edhe zgjati një javë, dy javë. Jo ka ik në Itali personi që është në studio. E filloi t’u ndërru numra. Edhe atëherë e kontaktum arkitektin. Ai i tha: taksat nuk janë pagujt. Aty, aty del që është për mashtrim, aty e kuptum se kanë qenë krejt gënjeshtra. Ato kanë përfituar. Mirëbesimi është shkelur. Mbrapa i çova Denisit mesazhi, i thashë. U nxefa, u revoltova, i thashë, pse më ke gënjy o mashtrues e gjëna të tilla? Ai ma fiku krejt kontaktin. Edhe ne u morëm me Erionin, Erioni doli me pretekstin që unë nuk di ça ka bë Denisi. Ai ka përdorur emrin tim dhe ka bërë gabim.”
Arkitekti shfajësohet tërësisht përballë Eljonit, duke ia lënë gjithë peshën e fajit bashkëpunëtorit të tij. Nga ana tjetër Denisi pretendon se lekët i ka marrë ai në dorë, por ia ka dorëzuar arkitektit, ndërsa ky i fundit i ka shpenzuar duke paguar ditëlindjen e çunit, e duke blerë një makinë.
Në përballjen me Piranjat, arkitekti mohoi çdo akuzë të ish-mikut të tij, duke pretenduar se edhe ai është i mashtruar nga Denisi dhe se i është përdorur emri pa të drejtë. Ndërsa Denisi nga ana tjetër deklaron se ia ka kthyer lekët Eljonit, pavarësisht se faktet tregojnë tjetër gjë. Një skemë mashtrimi, ku duket qartë se viktima është vetëm Eljoni./Emisioni “Piranjat”
