Qeveria kanadeze ka prezantuar një projektligj të ri që synon kufizimin e emigracionit dhe rregullimin më të rreptë të kërkesave për azil, mes presioneve në rritje për të frenuar flukset migratore dhe për të adresuar krizën e strehimit në vend.
Projektligji 127-faqësh, i paraqitur nga Ministria e Emigracionit, përfshin masa që i japin autoriteteve kompetenca të shtuara për të pezulluar përpunimin e aplikimeve të reja për arsye të shëndetit publik apo sigurisë kombëtare, si dhe për të forcuar mbikëqyrjen në kufirin me SHBA-në.
Ndër propozimet më të debatueshme është një dispozitë që ndalon aplikimin për azil nga persona që kanë qëndruar në Kanada për më shumë se një vit. Aktualisht, refugjatët mund të kërkojnë azil në çdo kohë, pavarësisht kohëzgjatjes së qëndrimit të tyre në vend. Me ndryshimet e reja, ata që nuk përmbushin afatin do të jenë të rrezikuar nga dëbimi.
Afat 14-ditor për aplikim nga kufiri me SHBA
Projektligji vendos edhe një afat 14-ditor për personat që hyjnë në Kanada nga SHBA, në bazë të Marrëveshjes së Vendit të Sigurt të Tretë, për të dorëzuar kërkesën për azil. Ata që nuk e respektojnë këtë afat, do të përjashtohen nga procesi, përveç rasteve kur një vlerësim i rrezikut provon kërcënim për jetën apo sigurinë e tyre nëse deportohen.
Kontroll më i rreptë financiar dhe kompetenca të zgjeruara për hetime
Ligji parashikon gjithashtu kufizime mbi transaksionet në para të gatshme mbi 10,000 dollarë kanadezë (rreth 6,400 euro) dhe ndalon depozitimin e shumave të tilla në llogaritë bankare të personave të tjerë. Po ashtu, autoritetet do të kenë të drejtën të hapin korrespondencë postare në rast hetimesh penale.
Ministrja e Emigracionit, Lena Diab, deklaroi se qëllimi i ligjit është të luftojë krimin e organizuar, trafikun e drogës dhe armëve, si dhe të ruajë integritetin e sistemit të emigracionit në vend.
Reagim ndaj krizës së strehimit dhe rritjes së kërkesave për azil
Sipas BBC, ky projektligj vjen në një kohë kur Kanadaja përballet me një krizë të thellë strehimi dhe mbingarkesë në shërbimet publike, për shkak të rritjes së ndjeshme të emigracionit gjatë viteve të fundit.
Gjatë qeverisjes së mëparshme të Justin Trudeau, emigracioni ishte përdorur si motor zhvillimi ekonomik. Por, kjo solli një rritje të madhe të numrit të punëtorëve të përkohshëm, studentëve ndërkombëtarë dhe aplikantëve për azil, duke zgjatur proceset e shqyrtimit deri në dy vjet.
Kryeministri i ri, Mark Carney, i cili fitoi zgjedhjet në prill, është zotuar të trajtojë “nivelin e paqëndrueshëm të emigracionit” dhe të rivendosë ekuilibrin në sistemin kanadez të pranimit të të huajve.
