Samuel Chukwueze ka deklaruar pse Milan pati një paraqitje të dobët në sezonin e sapo përfunduar.
Skuadra përfundoi e teta në Serie A dhe nuk do të luajë në Europë kur të fillojë sezoni 2025-26.
Lojtari nigerian dha një pasqyrë se ku skuadra e tij bëri gjithçka gabim: “Fillimi i sezonit me një trajner dhe përfundimi i fazës parapërgatitore me të, pastaj ndërrimi i trajnerit në mes ishte mjaft i vështirë”, tha Chukwueze për SportsBoom.
“Kur erdhi një trajner i ri, gjithçka ndryshoi nga taktikat, formacionet dhe stili i lojës. Lojtarët ishin të etur dhe të uritur, por përshtatja e shpejtë me idetë dhe sistemet e reja nuk ishte e lehtë”.
“Kjo ndikoi në performancën tonë, duke na kushtuar një vend në Champions League. Futbolli nuk shkon gjithmonë sipas planit dhe ndonjëherë loja nuk rrjedh ashtu siç dëshiron”.
“Në ato momente, çelësi është të luftosh për çdo top dhe të japësh më të mirën individualisht dhe si ekip.”
“Suksesi vjen nga vendosmëria dhe puna e palodhur, edhe kur gjërat nuk shkojnë sipas dëshirës tënde. Duhet të vazhdosh të shtysh përpara, duke bërë që gjithçka të funksionojë vetë dhe së bashku me shokët e ekipit”.
