Presidenti i Interit, Beppe Marotta, ka folur pas humbjes 5-0 që Interi mori ndaj PSG. Ai tha se kundërshtari dominoi totalisht skuadrën e tij, ndërsa tha se futbolli italian nuk është më tërheqës për futbollistët më të mirë.
Nga “Sky Sport” ai u pyet menjëherë edhe për Inzaghin, trajnerin e Interit që është në dyshim për të ardhmen. Marotta tha se trajnerit i ka mbetur edhe një vit nga kontrata e tij dhe se meritat e trajnerit nuk mund të fshihen nga kjo ndeshje e keqe.
“Një mbrëmje e keqe. Kundërshtari na deklasoi, por kjo nuk duhet të ndikojë në sezonin tonë. Luajtëm kundër një ekipi shumë të fortë, na vjen keq për paraqitjen, na vjen keq për tifozët që erdhën deri këtu, ishte një mbrëmje absolutisht negative.
Ishte shumë e vështirë për të arritur në këtë mbrëmje, e arritëm me shumë meritë. Sonte ne ishim shumë të brishtë. Gjatë rrugës kemi treguar se e meritojmë këtë fazë.
Asnjë ndryshim në vlerësimin për Inzagin, thamë se do të shihemi javën e ardhshme, i ka mbetur edhe një vit nga kontrata e tij dhe në këto katër vite ka treguar se është në lartësinë e duhur. Nuk është një mbrëmje e keqe që fshin të gjitha meritat.
Italia nuk është më parajsa ku erdhën të gjithë, lojtarët më të mirë vijnë këtu, por rrezikojnë të ikin kur përballen me oferta për paga më të mëdha nga jashtë”, u shpreh Marota.
