Kryeministri në detyrë, Albin Kurti, ka shprehur pakënaqësi ndaj deputetëve opozitarë për refuzimin e kandidaturës së Albulena Haxhiut për kryetare të Kuvendit, duke e krahasuar këtë qëndrim me mbështetjen e mëparshme të tyre për disa vendime të debatueshme.
Në një takim me gra të Lëvizjes Vetëvendosje, të mbajtur në kuadër të Këshillit të Përgjithshëm të partisë, Kurti tha se deputetët që sot refuzojnë ta mbështesin Haxhiun janë të njëjtët që në të kaluarën kanë përkrahur nisma si krijimi i Asociacionit të komunave me shumicë serbe, Gjykata Speciale, amnistimi i personave të përfshirë në krime në veri, si dhe marrëveshja për demarkacionin me Malin e Zi.
“Albulena Haxhiu është gruaja më e votuar në zgjedhjet e 9 shkurtit nga qytetarët. Në vend që të respektojnë vullnetin e popullit, opozitarët e luftojnë Albulenën,” u shpreh Kurti. Ai shtoi se këta deputetë jo vetëm që nuk e mbështetën kandidaturën e saj, por edhe penguan kuorumin për votimin e fshehtë në Kuvend.
Sipas Kurtit, pesë prej deputetëve opozitarë kanë qenë pjesë e të gjitha vendimeve që ai i konsideron të dëmshme, ndërsa Albulena Haxhiu, sipas tij, nuk ka qenë e përfshirë në asnjë prej tyre.
