Prokuroria e Fierit ka nisur hetimet për pronarin dhe punonjësin e OSHEE-së, për “shtëpinë e barit” në fshatin Vadhizë. Bëhet me dije se mbi pronarin e banesës 63-vjeçarit Isa Gashi rëndojnë akuzat e “Prodhimi dhe shitja e lëndëve narkotike”, “Kultivimi i bimëve narkotike”, “Vjedhja e energjisë elektrike ose impulseve telefonike”. Kurse për punonjësin e OSHEE-së, Ramis Malaj ajo e shpërdorimit të detyrës.
“Prokuroria pranë Shkallës së Parë e Juridiksionit të Përgjithshëm Fier nis hetimet për veprat penale “Prodhimi dhe shitja e lëndëve narkotike”, “Kultivimi i bimëve narkotike”, “Vjedhja e energjisë elektrike ose impulseve telefonike” të parashikuara nga nenet 283/1, 284/1 dhe 137/1 të Kodit Penal në ngarkim të shtetasit I.G. dhe “Shpërdorimi i detyrës”, e parashikuar nga neni 248 i Kodit Penal, në ngarkim të shtetasit R.M”, njofton prokuroria.
Ndërkohë kujtojmë që me 26 maj, policia zbuloi brenda banesës së 63-vjeçarit një ambient të përshtatur për kultivim të bimëve narkotike me anë të llambave.
Policia sekuestroi: 41 bimë narkotike kanabis sativa, 57 fidanë kanabisi, një sasi me lëndë narkotike kanabis të përpunuar, 784 fara kanabisi, 5 panele elektrike, 8 llamba për ndriçim dhe ngrohje, 2 filtra, 3 ventilatorë freskues, 2 aspirator dhe 18 pajisje të tjera elektrike të përdorura për kultivimin në ambiente të mbyllura.
