Një bombol gazi ka rrezikuar të shpërthejë në një pallat trekatësh mëngjesin e kësaj të mërkure, rreth orës 08:00 në lagjen “Kastriot” të Fierit
Mësohet se bombola e gazit ka marrë flakë, duke shkaktuar panik në familjen e banesës ku ka ndodhur ngjarja, si dhe te fqinjët përreth.
Gruaja e shtëpisë, e cila ndodhej në ambientet e banesës, ka arritur ta diktojë në kohë zjarrin dhe ka ndërhyrë për ta shuar, por ka pësuar djegie në fytyrë gjatë përpjekjes për të mbyllur rrjedhjen e gazit, ku për shkak të dëmtimeve nuk ka arritur dot ta ndërpresë.
Dy mjete zjarrfikëse kanë shkuar në vendin e ngjarjes, duke thyer dritaret për të ajrosur ambientin, ndërkohë që banorët e pallatit janë evakuuar për të shmangur rrezikun e një shpërthimi të mundshëm.
Menjëherë pas sinjalizimit, në vendngjarje mbërritën dy mjete zjarrfikëse, ambulanca dhe forcat e policisë. Zjarrfikësit kanë ndërhyrë duke thyer dritaret për të ajrosur ambientin, ndërkohë që banorët e pallatit janë evakuuar me urgjencë për të shmangur rrezikun e një shpërthimi të mundshëm.
Policia njoftoi drejtuesit e mjeteve pranë zonës që të mos ndiznin motorët, pasi era e gazit ishte përhapur në të gjithë perimetrin përreth. Zjarrfikësit arritën të neutralizonin situatën dhe të largonin bombolën.
Gruaja e plagosur u transportua në spitalin e Fierit, ku po merr ndihmë mjekësore. Burime spitalore konfirmojnë se ajo ndodhet jashtë rrezikut për jetën, megjithatë ka marrë plagë djegëse në fytyrë.
