Kryeministri i Izraelit, Benjamin Netanyahu, deklaroi të mërkurën para parlamentit se Mohammed Sinwar, një nga figurat kryesore të Hamasit në Rripin e Gazës dhe vëllai më i vogël i liderit të vrarë Yahya Sinwar, është “eliminuar” në një operacion ushtarak.
Në fjalën e tij, Netanyahu e përfshiu emrin e Mohammed Sinwar në listën e udhëheqësve të Hamasit të vrarë gjatë ofensivave të fundit ajrore izraelite, megjithatë, deri më tani nuk është dhënë një konfirmim zyrtar nga Forcat e Mbrojtjes së Izraelit.
Burime nga IDF, të cituara nga Jerusalem Post, thanë se dyshohet se trupi i Sinwar është gjetur së bashku me rreth 12 ndihmës të tij, përfshirë komandantin e brigadës Rafah, Mohammed Shabanah, i njohur si një nga pasuesit e mundshëm të tij.
Mohammed Sinwar konsiderohej një nga figurat më të kërkuara nga autoritetet izraelite. Ai ishte pjesë e rrethit të ngushtë të udhëheqjes së Hamasit në Gaza dhe kishte një rol aktiv në strukturën ushtarake të grupit. Deklarata e Netanyahu vjen disa javë pas raportimeve të ministrit të Mbrojtjes, Israel Katz, i cili kishte paralajmëruar se ekzistonte “një numër në rritje provash” që tregonin se Sinwar mund të ishte vrarë.
Yahya Sinwar, vëllai i madh i Mohammedit, u vra nga trupat izraelite vitin e kaluar. Ai ishte konsideruar “truri” i sulmeve të Hamasit më 7 tetor 2023 ndaj Izraelit dhe kishte marrë komandën e përgjithshme të grupit pas vrasjes së Ismail Haniyeh, gjithashtu në një sulm ajror të dyshuar izraelit në Iran.
Zyrtarët izraelitë nuk kanë dhënë ende detaje mbi operacionin që pretendohet të ketë çuar në eliminimin e Mohammed Sinwar, ndërsa konfirmimi përfundimtar i vdekjes së tij pritet nga autoritetet ushtarake.
