Puna që ka përpara Igli Tare, i zyrtarizuar të hënën pasdite si drejtori i ri sportiv i Milanit, padyshim është e madhe. Janë shumë fusha ku drejtori shqiptar duhet të lëvizë, si në pjesën e afrimeve, ashtu edhe të largimeve në merkato.
Në dalje, një nga lëvizjet më të rëndësishme që mund të ndodhë është largimi i Theo Hernandez, i cili tashmë është lënë në periferi, si nga ambienti i dhomës së zhveshjes së kuqezinjve, ashtu edhe nga projekti teknik.
Për francezin e Milanit prej kohësh po vepron me bindje klubi saudit i Al Hilal (i cili, ndërkohë, ka vënë në shënjestër edhe Simone Inzaghin e Barellën, në anën tjetër të futbollit milanez). Nëse Theo Hernandez do t’i nënshtrohej tundimit milioner saudit, atëherë “Djalli” duhet të nisë menjëherë kërkimin për një zëvendësues. Dhe janë dy emra që dalin në pah, të paktën sipas “Tuttosport”.
Njëri është i njohur prej javësh, quhet Maxime De Cuyper, luan në Belgjikë te Club Brugge. Për 24-vjeçarin e përfaqësueses belge interesohet edhe Juventusi. Profili tjetër është gjithashtu i njohur, madje është përmendur për Milanin më përpara se De Cuyper.
Bëhet fjalë për Junior Firpo, aktualisht te Leeds, por që ishte kërkuar (pikërisht si zëvendësues i Theo Hernandez) në kohën kur ishte te Barcelona. Kontrata që i skadon me klubin e sapo ngjitur në Premier League mund ta bëjë atë një rast shumë të mirë për merkaton e Milanit.
