Xabi Alonso është gati të nisë një epokë të re te Real Madridi dhe tifozët e bardhë janë më të emocionuar se kurrë. Një foto që po qarkullon në rrjetet sociale, së cilës i është referuar edhe “Marca”, po ngjall diskutime të shumta.
Bëhet fjalë për formacionin e mundshëm të “Los Blancos” nën drejtimin e ish-mesfushorit legjendar. E veçanta? Një skemë taktike 3-4-1-2, e cila mbart shumë nga stili i tij inovativ, që shkëlqeu te Bayer Leverkusen.
Në prapavijë, Courtois ruan portën, ndërsa Xabi beson para belgut te një treshe e fuqishme mbrojtëse: Huijsen, Rüdiger dhe Militão (me Carvajal si alternativë). Ky ndryshim nga katërshja klasike në mbrojtjen me tre është sinjal i qartë për një Real Madrid më progresiv dhe me dalje më të shpejta nga prapavija.
Mesfusha duket hibride dhe me krahë të rinj. Në qendër të fushës qëndrojnë Tchouaméni dhe Valverde, dy lojtarë fizikisht dominues dhe teknikisht të rafinuar.
Në krahë, surpriza më e madhe është Carreras, një emër që ende nuk është zyrtarizuar, por që sipas zërave mediatikë është në planet e klubit si krahu i majtë ideal për sistemin 3-4-1-2.
Në të djathtë, konkurrenca do të jetë e fortë mes Trent Alexander-Arnold dhe Dani Carvajal, me të parin që ende nuk është zyrtarisht i afruar, por mbetet një nga prioritetet e merkatos së bardhë.
Përpara tyre, Jude Bellingham pozicionohet si “fantazist”, një rol që i përshtatet në mënyrë perfekte, për ta lidhur mesfushën me sulmin. Po për sulmin? Kombinimi që tremb çdo mbrojtje në botë: Vinicius Junior në të majtë dhe Kylian Mbappé në të djathtë. Një dyshe elektrizuese që premton gola, spektakël dhe shkatërrim të mbrojtjeve kundërshtare.
Ky formacion nuk është vetëm një listë emrash të mëdhenj, por “deklaratë” e asaj që presim nga trajneri i ri. Xabi Alonso kërkon të ndërtojë një Real Madrid që dominon jo vetëm përmes cilësisë individuale, por edhe përmes ideve moderne dhe fleksibilitetit taktik.
Kalimi te një mbrojtje me tre dhe përdorimi i krahëve si motorë të skuadrës është hap i guximshëm për një klub që gjithmonë ka kërkuar përsosmërinë.
A është kjo skuadra që do të sjellë një tjetër epokë të artë në Madrid? Tifozët janë të ndarë për këtë, por një gjë duket e sigurt: nën drejtimin e Xabi Alonsos, Real Madridi po përgatitet të jetë më modern, më agresiv dhe më spektakolar se kurrë më parë.
