Një fytyrë e njohur për futbollin shqiptar dhe atë zviceran rikthehet në një rol të rëndësishëm. Ish-mesfushori i Kombëtares shqiptare, Burim Kukeli, është emëruar trajner i ekipit nën 21 vjeç të FC Zürich, duke marrë drejtimin e të rinjve të klubit ku ka shkruar një pjesë të rëndësishme të karrierës si futbollist.
Lajmi është bërë zyrtar nga vetë klubi zviceran, i cili përmes një njoftimi në faqet e tij zyrtare shprehu besimin ndaj 41-vjeçarit:
“Burim Kukeli do të jetë trajneri i ri i ekipit tonë U21. Ai ka përvojë të gjatë si futbollist dhe ka ndërtuar një rrugë solide si trajner në vitet e fundit. FCZ i uron mirëseardhje dhe suksese në këtë sfidë të re.”
Kukeli ka një histori të veçantë me Zyrihun, ku luajti nga viti 2012 deri më 2017, duke grumbulluar 100 ndeshje zyrtare. Pas përfundimit të karrierës si lojtar, ai nisi rrugëtimin e tij në stolin teknik si ndihmës trajner në klube si SC Kriens, FC Wil, FC Sion dhe Grasshopper, ku për një periudhë të shkurtër në vitin 2023 drejtoi edhe ekipin U-21 si trajner i parë.
Me 27 paraqitje me fanellën kuqezi, Kukeli mbetet një emër i respektuar në futbollin shqiptar dhe duket i vendosur ta dëshmojë veten edhe në fushën e trajnimit. Rikthimi i tij në Zyrih përbën një hap domethënës në karrierën e tij si trajner.
