Real Madridi ka zyrtarizuar këtë të premte largimin e Carlo Ancelotti-t nga drejtimi i ekipit. Ky njoftim vjen pak ditë pasi u konfirmua zyrtarisht se trajneri italian do të marrë drejtimin e kombëtares së Brazilit.
Klubi madrilen ka falënderuar publikisht “një nga legjendat më të mëdha të Real Madridit”, duke theksuar se Ancelotti është bërë trajneri me më shumë trofe në historinë e klubit: plot 15 tituj të fituar në gjashtë sezone.
Ancelotti e drejtoi Realin në dy periudha të ndryshme: fillimisht në sezonet 2013/14 dhe 2014/15, dhe më pas nga viti 2021 deri në këtë sezon, ku do të përshëndetet përfundimisht me tifozët në ndeshjen e fundit në “Santiago Bernabéu”.
Në deklaratën zyrtare thuhet:
“Real Madridi dhe Carlo Ancelotti kanë arritur një marrëveshje për të përfunduar fazën e tij si trajner i klubit tonë. Klubi dëshiron të shprehë mirënjohjen dhe dashurinë për një nga legjendat më të mëdha të Real Madridit dhe të futbollit botëror.”
Gjatë drejtimit të tij, Ancelotti fitoi:
3 Liga të Kampionëve
3 Kupa të Botës për Klube
3 Superkupa të Europës
2 La Liga
2 Kupa të Mbretit
2 Superkupa të Spanjës
Presidenti Florentino Pérez deklaroi:
“Carlo Ancelotti do të jetë gjithmonë pjesë e familjes së madhe të Real Madridit. Jemi krenarë që kemi pasur një trajner që na ka ndihmuar të arrijmë kaq shumë suksese dhe që ka përfaqësuar vlerat e klubit në mënyrë shembullore.”
Në ndeshjen e fundit të sezonit në “Bernabéu”, do t’i bëhet një homazh i posaçëm Ancelottit. Real Madridi i uron atij dhe familjes së tij gjithë të mirat në këtë kapitull të ri të jetës.
