Gjykata e Lartë ka prishur vendimin e Gjykatës së Posaçme të Apelit për Blendi Tetën, i cili ishte dënuar me 25 vite burgim si i përfshirë në vrasjen e ish-efektivit të Policisë Santiaho Malko, i cili u ekzekutua brenda makinës së tij, mbrëmjen e 27 gushtit të vitit 2019, në Tiranë
Shkalla e tretë e gjyqësorit, në dhomë këshillimi, këtë të enjte vendosi prishjen e vendimit tëdhënë më 14 qershor 2022 nga Apeli dhe dërgimin e çështjes për rigjykim në këtë gjykatë, por me një tjetër trup gjykues.
Blendi Teta dyshohet se ka patur rolin e bashkëpunëtorit në vrasjen e Santiago Malkos, teksa në dëshmitë e dhënë në Gjykatë ka thënë se pas vrasjes është marrë peng nga Ervis Matrtinaj, për t’i treguar vendodhjen e vëllezërve Leonard dhe Erlis Duka.
Sipas hetimeve, vrasja e Santiago Malkos kishte ndodhur për shkak të rivalitetit në lojërat e fatit mes dy grupeve kriminale, por ekzistojnë dhe dyshimet se Malko ishte vrarë në pamundësi të eliminimit të Ervis Martinajt. Kjo, pasi disa plane për vrasjen e tij kishin dështuar.
Vrasja e Santiago Malkos ishte planifikuar nga një grup i përbërë nga 7 anëtarë, të cilët kanë qenë aktivë në terren, ndërsa dy persona të tjerë janë ata që kanë urdhëruar dhe paguar Fatmir Hysenin për të kryer ekzekutimin.
Në dosjen hetimore theksohet se urdhërues të vrasjes janë vëllezërit Leonard dhe Erlis Duka. Ndërsa grupi që punonte për ta dhe mori pjesë me role të ndryshme në vrasjen e Santiago Malkos, janë: Ilir Selmani, Oltian Loga, Dritan Agaj, Aleksandër Maxhaku, Xhoni Nica, Fatmir Hyseni dhe Blendi Teta.
Veç Blendi Tetës, GJKKO deri tani ka dënuar edhe Ilir Semlanin me 28 vjet burg. I njëjti vendim është lënë në fuqi më 16 nëntor 2023 edhe nga Gjykata e Posaçme e Apelit. Ndërsa ka vendosur prishjen e vendimit për dënimin me 7 vjet burg të Elvis Gaçajt, një tjetër i akuzuar në këtë çështje, duke kthyer dosjen ndaj tij në shkallën e parë. Ndërkohë, për personat që janë ende në kërkim, gjykimi vazhdon veçmas në mungesë.
