Megaoperacioni quajtur “Ura” në Shqipëri e Itali goditi një grup të fuqishëm kriminal me bazë në zonën e Shijakut, që merrej me trafikim të drogave të forta e pastrim parash.
Siç u bë me dije të mërkurën janë lëshuar 51 masa sigurie dhe një urdhër ndalimi. Në total, janë ekzekutuar 42 prej tyre. Në vendin tonë janë lëshuar 29 masa sigurie ku përfshihen edhe ato ndaj dy punonjësve të policisë, një avokati në Durrës dhe një biznesmeni.
Gazetarja Anduena Llabani tha se rreth 6 oficerë të Antmafjes dhe prokurorë punuan më muaj të tërë për të zbardhur të gjitha bisedat në Sky ECC dhe Encro Chat që çuan në “çmontimin” e grupit kriminal dhe identifikimin e emrave, nga dërguesi e deri te marrësi.
Nga përgjimet kanë arritur që të shkojnë deri tek personat dhe ata më të dobëtit janë thyer dhe kanë arritur që të flasin. Ajo që i ka zbërthyer janë platformat Sky ECC dhe Encro Chat. Është ngritur një grup prej 5 deri në 6 oficerë të antimafies dhe prokurorë shqiptarë, të cilët kanë punuar me muaj të tëra për zbardhjen e bisedave, sepse bisedat që janë zbardhur dhe transkriptuar është folur me fakte dhe prova për ngjarje, vende dhe emra konkretë se ku do të vinte malli, në çfarë vendi dhe kush do e merrte. Nuk ishte fare e vështirë për të arritur tek porositësi, lidhja dhe kish ishte organizatori”, tha gazetarja.
