Partia Demokratike arriti të fitonte në Bashkinë e Krujës në zgjedhjet parlamentare të 11 Majit, teksa kandidat i demokratëve në këtë zonë ishte Aulon Kalaja, i cili mori 8120 vota preferenciale, por të pamjaftueshme për të marrë mandatin e deputetit.
Ai vijon të jetë i zhgënjyer me rezultatin, teksa i ka kërkuar KQZ pamjet filmike të numërimit ë votave, pasi pretendon se ia kanë vjedhur.
I ftuar në A2 CNN, kandidati demokrat u shpreh se në këto zgjedhje Edi Rama kishte ndryshuar skemë duke hedhur në “betejë” njerëz anonimë, të cilët dolën me nga 20 mijë vota, pasi u mbështetën nga krimi i organizuar.
Në lidhje me fitren që arriti në Krujë, Aulon Kalaja u shpreh se ka bërë fushatë modeste, duke thënë se ka harxhuar vetëm 6 milionë lekë të vjetra.
“Durrësi ka qenë një qark i diktuar nga krimi i organizuar. Radhën e kaluar gjysma e listës përfundoi në burg. Këtë herë po të shihni ka njerëz mbi 20 mijë vota, që nuk kanë mbrojtur asnjë kauzë dhe pas tyre ka tutorë votash që i kanë ushqyer me vota. Mesa duket ka pasur një plan nga PS me kandidatë që i ka patronazhuar krimi. Një manovër për të parë se sa i fortë është ky grup. Në Durrës, ne fituam në Krujë që nuk fitohej nga PS. Fushë Kruja dha peshën kryesore.
Në 2023 kjo bashki u humb me 10 mijë vota. Kam marrë mbi 820 vota nga diaspora. Janë qytetarë të lirë që kanë besuar te tezat e mia. Unë kam bërë një fushatë të thjeshtë. Nuk kam harxhuar më shumë se 6 milionë lekë të vjetra. Jam kandidati i parë që bëj publike këtë. Kam pas objeksione, nesër marrë pamjet nga KQZ. Unë nuk jam gjuetar votash, kam jetuar me hallet e tyre”, – tha Aulon Kalaja.
