Ka përfunduar numërimi i votave preferenciale për Qarkun e Tiranës, ku socialistët kanë marrë 7 mandate nga lista e hapur, ndërsa Partia Demokratike vetëm një.
Më i votuari tek socialistët rezulton ministri i Ekonomisë, Blendi Gonxhja, me shumë hije dyshimi, ku ka arritur të marrë 24 788 vota preferenciale.
Pas tij renditet Erion Braçe me 23 850 vota personale, i ndjekur nga Ervin Hoxha 20 144 vota dhe Fatmir Xhafaj me 13 667 vota.
Sa i përket “luftërave” brenda llojit, Ornaldo Rakipit, djali i Aqif Rakipit të shpallur “non grata” nga SHBA do të futet në Kuvend, duke lënë jashtë Xhemal Qefalian. Rakipi ka marrë 10 419 vota preferenciale, ndërsa Qefalia 9 949 vota. Diferenca mes tyre është rreth 470 vota.
Tek gratë, mandatin e ka marrë ministrja Anila Denaj me 9 254 vota preferenciale, ndërsa beteja mes Olta Xhaçkës dhe Blerina Gjylametit është fituar nga e para, e cila do të vazhdojë të jetë deputete edhe për legjislaturën e ardhshme.
Olta Xhaçka ka arritur të marrë 6 281 vota preferenciale, ndërsa Blerina Gjylameti 6 143 vota, ku siç duket diferenca mes tyre është vetëm 138 vota.
Olta Xhaçka e rrezikonte mandatin nga Gjykata Kushtetuese që legjislaturën që mbaroi, për shkak të konfliktit të interesit se ishte pjesë e vendimit të Këshillit të Ministrave që bashkëshortin e saj Artan Gaçi e shpalli investitor strategjik. Rama i vuri deputetët në rresht, duke rrëzuar disa herë kërkesat e Kushtetuese dhe e mbrojti Xhaçkën, ku siç duket e ka përkrahur edhe në këtë fushatë.
Xhemal Qefalia, Pandeli Majko, Toni Gogu, edhe pse kanl marrë më shumë vota se Olta Xhaçka, madje Qefalia edhe më shumë vota se Anila Denaj, por digjen për shkak të kuotave gjinore të përcaktuara në ligj se një nga tre kandidatë fitues duhet të jetë grua.
Veç emrave të mësipërm, jashtë Kuvendit nga PS mbetën edhe Etilda Gjonaj, Mimi Kodheli, Plarent Ndreca, Ermonela Felaj, Arben Pëllumbi, Etjen Xhafaj, etj.
Tek kampi demokrat, të vetmin mandat nga lista e hapur e ka marrë Jorida Tabaku, e cila ka arritur të marrë 20 558 vota preferenciale. Ndjekësi i saj, Ilir Alimehmeti ka marrë 18 112 vota. Pas tyre renditet Ilir Meta me 7 979 vota, Asllan Dogjani 7 260 vota dhe Myslim Murrizi me 7 255 vota.
Lista e 7 kandidatëve fitues të PS
- Blendi Gonxhja – 24 788 vota
- Erion Braçe – 23 850 vota
- Ervin Hoxha – 20 144 vota
- Fatmir Xhafaj – 13 667 vota
- Ornaldo Rakipi – 10 419 vota
- Anila Denaj – 9 254 vota
- Olta Xhaçka – 6 281 vota
