Në përfundim të samitit të Komunitetit Politik Evropian që u zhvillua në Tiranë, kryeministri Edi Rama mbajti një konferencë të përbashkët për shtyp me kryeministren e Danimarkës, Mette Frederiksen.
Kjo e fundit zbuloi kërkesat që presidenti i Ukrainës i kishte bërë Evropës në këtë samit.
“Mesazhi i Ukrainës që morëm sot është shumë i ngjashëm me ato që ka thënë më parë: Ju lutem, na jepni atë që na nevojitet për t’u mbrojtur,” u shpreh Frederiksen.
“Unë mendoj se Ukraina është shumë e qartë për mënyrën si po trajtohet situata dhe mesazhet që po dërgon përmes Evropës. Do të ketë disa pengje që do të lirohen, por pritet që Rusia të kthehet dhe të jetë serioze në tryezë. Sigurisht, Ukraina tha se, ndërkohë që ne po përgatitemi me shpresën për një armëpushim, lufta ende po vazhdon” tha Frederiksen.
Ajo gjithashtu u pyet nga gazetarët mbi zgjedhjet e BE-së në lidhje me sanksionet ndaj Rusisë, në momentin kur SHBA-të kanë bërë një hap pas.
Zyrtarja e lartë u shpreh se BE, ashtu si dhe SHBA, është në unison përsa i përket sanksioneve ndaj Rusisë nëse ajo nuk pranon marrëveshjen e armëpushimit 30-ditor që e ka pranuar edhe Ukraina.
“A mund të bëjë më shumë BE ndaj Rusisë pa mbështetjen e SHBA?” ishte pyetja e gazetarit.
“Sa u përket sanksioneve, deri tani SHBA ka qenë shumë e qartë. Ajo që i kërkojmë Rusisë është të bëjë atë që po bën Ukraina në tryezë, që të realizojë dhe të gëzojë armëpushim 30-ditor. Kemi parë se SHBA është e gatshme të vendosë më shumë sanksione në tryezë nëse Rusia nuk bie dakord, ashtu siç edhe ne. Deri tani kemi parë se Rusia nuk ka qenë e gatshme. Unë këshilloj t’i hedhim sytë drejt sistemit bankar, energjisë, gazit dhe flotës”, tha Frederiksen.
