Klubi i Vllaznisë ka zyrtarizuar largimin e trajnerit Thomas Brdariç, vetëm një ditë pas humbjes së thellë 4-0 ndaj Egnatias në finalen e kampionatit.
Rezultati negativ i sfidës përmbyllëse të sezonit ka sjellë vendimin për të mos vazhduar bashkëpunimin me teknikun gjerman, i cili largohet për herë të dytë nga stoli shkodran në pesë vitet e fundit.
Klubi tashmë është përqendruar në gjetjen e trajnerit të ri, i cili do të marrë drejtimin e skuadrës për edicionin 2025-2026.
Ndër emrat që janë përfolur së fundmi është ai i Edi Martinit. Ish-futbollisti shkodran, aktualisht trajner i Trepçës në elitën e futbollit të Kosovës, shihet si një nga kandidatët kryesorë për të marrë frenat e ekipit.
Një tjetër alternativë është Vioresin Sinani, aktualisht në rolin e zëvendëstrajnerit në stafin teknik të Vllaznisë.
