Zvonimir Boban lëshoi pak ditë më parë një sulm shumë të rëndë ndaj Milanit dhe drejtuesve aktuale të grupit kuqezi. Ai zbërtheu një nga një të gjithë veprimet që kishte bërë në klub për të ndërtuar grupin fitues të titullit kampion, ndërsa tregoi se emrat që ishin vënë në rolet më të larta drejtuese nuk kishin shumë lidhje me futbollin.
Një prej emrave që ai sulmoi më shumë ishte Paolo Skaroni, presidenti i kuqezinjve. “Një njëri që nuk duhej të ishte kurrë në futboll. Nuk ka asnjë lidhje me futbollin, por disa persona, për rolin që kanë mbajtur, nuk kanë pyetur asnjëherë nëse ishte e drejtë apo jo të bëhej një gjë e caktuar.
Isha në stadium dhe i drejtohesha me “ju”, pasi e mbaja mjaft larg. Ai nuk mund të shkonte në një mbledhje Lige dhe kërkonte të shkonte dikush tjetër. Paolo Maldini i tregoi që kisha mbuluar shumë role, në UEFA dhe jo vetëm, të shkoja në një mbledhje të Ligës ishte buka e përditshme.
Ai më kërkoi që t’i dërgoja një CV. E shava, praktikisht e nxora jashtë zyrës. I thashë “Çfarë k*** bën në futboll?”. Më kërkoi CV që të dinte se çfarë kisha bërë unë në jetë, iu përgjigja se nuk duhej ta dinte dhe në atë pikë nuk kishte pse të kisha më respekt as unë ndaj tij”, ishin fjalët e Boban.
Sot, në mbledhjen e Ligës së Serisë A, ka qenë i pranishëm edhe Skaroni, i cili është ngacmuar nga gazetarët rreth këtyre deklaratave. “Ka thënë që drejtuesit nuk kuptojnë nga futbolli? Po flet për veten… Tha se i kërkova CV? Më dukej gjë e drejtë…”, ishin përgjigjet e shkurta të drejtuesit aktual të kuqezinjve.
