“Zjerm” nga Shkodra Elektronike përfaqëson Shqipërinë në Eurovision 2025. Një këngë atdhetare dhe patriotike, ku në çdo rresht e tingull dashuria e madhe për Shqipërinë “merr zjerm”.
Tashmë kemi hyrë në “muajin e Eurovision-it” dhe ethet e garës duket se kanë nisur. Dy gjysmëfinalet e Eurovision-it do të mbahen në datat 13 dhe 15 Maj, kurse finalja e madhe më 17 Maj.
Megjithatë sondazhet për të matur preferencat e publikut për këngën e parapëlqyer kanë nisur. Sipas sondazheve Shqipëria në këtë Eurovision rendet goxha mirë.
Votuesit e renditin “Zjerm” nga Shkodra Elektronike në top 10, të vendeve që kanë shanse të fitojnë Eurovision 2025. Shqipëria renditet në vendin e pestë, kurse në vend të parë kryeson Suedia, e ndjekur më pas nga Holanda dhe Estonia.
Më pas në sondazhet për vendet e Ballkanit, Shqipëria kryeson me 61% gjasa për të pasur rezultatet më të mira. Pas Shqipërisë vjen Greqia e ndjekur nga Sllovenia. Në vendin e katërt dhe të pestë renditet Serbia dhe Kroacia, kurse në vend të fundit Mali i Zi.
Sondazhet për gjysmëfinalen e parë e renditin Shqipërinë në vendin e pestë, kurse në vend të parë qëndron Suedia.
Ndërkohë website-i Wiwibloggs u ka kërkuar fansave që të shprehin mbështetjen e tyre për artisin e preferuar që do të ngjitet në skenën e madhe të Eurovision 2025. Pas publikimit të këngëve në muajin Mars, rreth 18.951 votues kanë marrë pjesë. Shkodra Elektronike me këngën “Zjerm” ka marrë 2.106 vota.
“Shkodra Elektronike” u krijua nga Kolë Laca dhe Beatriçe Gjergji, dy shqiptarë me origjinë nga Shkodra, por që prej vitesh jetojnë dhe punojnë në Itali, ku veç të tjerash merren dhe me muzikë.
Në shenjë dashurie për atdheun dhe vendlindjen ata e quajtën “grupin” e tyre të vogël muzikor “Shkodra Elektronike”. Përveç këngës e cila do të këndohet në versionin origjinal, shqip, Kolë Laca dhe Beatriçe Gjergji ka vendosur që elementet shqiptare t’i marrin me vete dhe në skenën e Eurovision.
