Një vendim që vlen plot 30 milionë euro. Gjykata e Arbitrazhit Sportiv ka rrëzuar përfundimisht ankesën e paraqitur nga Sporting Lisbona ndaj Interit, duke konfirmuar se klubi zikaltër nuk detyrohet të paguajë asnjë dëmshpërblim për transferimin e Joao Marios te Benfica.
Historia nisi në verën e vitit 2016, kur Interi pagoi 44 milionë euro për të sjellë Joao Marion nga Sporting Lisbona, menjëherë pas një Europiani fantastik me Portugalinë. Bashkë me Gabigol, ai përfaqësonte simbolin e merkatos së parë të epokës Suning.
Por aventura e portugezit në Milano rezultoi zhgënjyese: performanca nën pritshmëri dhe mungesë intensiteti e shoqëruan që nga ndeshjet e para, duke marrë edhe fishkëllimat e ‘San Siros’. Pas disa huazimeve të njëpasnjëshme tek West Ham-i, Lokomotiva e Moskës dhe një rikthim te Sporting-u, Inter vendosi të ndërpriste kontratën me të.
I lirë nga çdo detyrim, Joao Mario firmosi më pas me rivalët e përjetshëm të ish-klubit të tij, Benfica – një veprim që bëri shyu Sporting-un të kërkonte 30 milionë euro dëmshpërblim, duke pretenduar se në marrëveshjen fillestare kishte një klauzolë që ndalonte Interin ta transferonte lojtarin te një klub tjetër portugez.
Përplasja ligjore dhe vendimi përfundimtar
Fillimisht, Sporting-u iu drejtua FIFA-s, e cila hodhi poshtë pretendimin, duke mos gjetur asnjë shkelje nga ana e Interit. Megjithatë, portugezët e çuan çështjen më tej, duke apeluar në KAS – por edhe këtu u përballën me një refuzim të prerë.
Vendimi i fundit i jep fund një sagë ligjore disavjeçare dhe i kursen Interit një pagesë të rëndë për një lojtar që, në fund të fundit, nuk arriti kurrë të lërë gjurmë në Milano. Pas 44 milionëve të investuara, zikaltrit shmangin të paktën një tjetër goditje financiare.
