Prokuroria e Beratit ka dhënë pretencën për pedofilin përsëritës, shtetasin Romeo Oço, rreth 60 vjeç, i cili në nëntor të vitit të kaluar akuzohet se ngacmoi seksualisht një djalë të mitur dhe më pas i kërkoi që të kryenin marrëdhënie seksuale.
Organi i akuzës kërkon shpalljen fajtor të pedofilit për veprën penale “ngacmim seksual” dhe dënimin e tij me 6 vite burgim.
Ngjarja ka ndodhur më 25 Nëntor të vitit të kaluar, ku shtetasi Romeo Oço ka kapur nga dora dhe e ka çjerrë të miturin me inicialet A.GJ. dhe më pas është vënë në ndjekje të tij, ku i ka kërkuar që të kryenin marrëdhënie seksuale, por pasi është afruar babai i të miturit, ai e ka lënë të lirë.
Fillimisht ndaj 60-vjeçarit ishte caktuar masa e sigurisë “detyrim paraqitje”, por pas daljes së akt-eskpertizës mjeko-ligjore, Gjykata e Beratit vendosi t’i caktonte masën “Arrest me burg”.
“Ky shtetas, më 25.11.2024, ka ngacmuar një të mitur, shtetasin A.Gj., i cili ka bërë kallëzim penal pasi edhe pse ka refuzuar ngacmimet e tij, ai e ka tërhequr e çjerrë nga dora dhe kjo situatë ndryshoi vetëm kur babai i të miturit, mbërriti në vendngjarje pas telefonatës nga i biri. Nga akti i ekspertimit mjekoligjor, rezultoi se i mituri kishte dëmtime të shkaktuara me mjet të fortë mbrehës dhe djali dëshmoi se ka lajmëruar të atin sapo vuri re se një burrë po e ndiqte nga pas duke tentuar ta tërhiqte me zor. Poshtëruese kanë qënë fjalët e përdorura nga personi në fjalë që ka kryer këtë vepër penale i cili ka përdorur një fjalor jo të përshtatshëm për moshën zhvillimore që djali i mitur të kuptojë se ky person po i kërkonte të kryente marrëdhënie intime me të pa dëshirën e tij.
Në përfundim të hetimeve dhe nga të gjitha rrethanat e faktit dhe provat e mbledhura të analizuara si më sipër, provohet tej çdo dyshimi të arsyeshëm që i pandehuri Romeo Oço, nëpërmjet veprimeve aktive të drejtpërdrejta ka kryer krimin e ngacmimit seksual ndaj shtetasit të mitur.” – thuhet në njoftimin e Prokurorisë.
Shtetasi Romeo Oço rezulton edhe i dënuar më parë për veprën penale të ngacmimit seksual.
