Nga Boldnews.al
Rreth tre vjet pas nisjes së një hetimi për “zhdukjen” e metaleve të shtrenjta nga ish-Uzina Mekanike e Poliçanit (fabrika e armëve), me vlerë 250 milionë lekë të vjetra, Prokuroria e Beratit nuk guxon të prekë ish-drejtorin Erjon Zylyftari, i cili mban edhe postin e kryetarit të Partisë Socialiste të qytetit.
Në vitin 2021, Kontrolli i Lartë i Shtetit zbuloi se ishin “zhdukur” 54 ton lëndë e parë tunxh, bronz dhe bakër, të cilat në letra ishin shënuar si “skrap”. Sipas përllogaritjeve të audituesve të KLSH-së, vlera totale e dëmit financiar të shkaktuar ishte 250 milionë lekë. Për këtë skandal të rëndë financiar, dyshimet e akuzave binin mbi ish-drejtorin e ndërmarrjes publike, Erjon Zylyftari.
Pasi mori këtë material në dorë, Prokuroria e Beratit njoftoi nisjen e hetimeve në vitin 2022. Madje, në kuadër të këtij hetimi, prokurorët morën në pyetje në korrik të vitit 2024 edhe ish-ministrin e Brendshëm, Bledi Çuçi.
Ky i fundit, pasi doli nga qëndrimi rreth 7 orë në zyrat e Prokurorisë së Beratit, deklaroi me ironi se “‘u thirra për të dëshmuar për disa rrethana që prokurori mendon që unë jam në dijeni. Ka të bëj nëse e njoh unë shtetasin Erjon Zylyftari, pra kryetarin e Partisë Socialiste të Poliçanit, apo jo, dhe a e kam takuar ndonjëherë apo jo”.
Pra, deri në atë moment, dukej se Prokuroria e Beratit po avanconte me hetimet ndaj ish-drejtorit Zylyftari.
Por, kur kanë kaluar më shumë se tre vjet nga nisja e procedimit penal dhe gati një vit nga marrja në pyetje e Bledi Çuçit, prokurorët nuk kanë arritur ende të konkludojnë për përgjegjësinë e ish-drejtorit Zylyftari, megjithëse shkeljet e gjetura nga Kontrolli i Lartë i Shtetit ishin flagrante dhe të argumentuara.
Rasti i Erjon Zylyftarit ngre sërish dyshime mbi rolin e zbehtë të Prokurorisë për të goditur eksponentë të rëndësishëm të Partisë Socialiste në pushtet.
Erjon Zylyftari, ndërkohë që do të duhej të përballej me drejtësinë për “zhdukjen” e 250 milionë lekëve, aktualisht është në krye të fushatës elektorale të Partisë Socialiste në fushatën e Poliçanit.
Metalet që mungojnë
Kontrolli i Lartë i Shtetit ka zbuluar sasinë e saktë të metaleve të shtrenjta, të cilat janë “zhdukur” dhe nuk rezultojnë në inventarin e Uzinës Mekanike Poliçan.
Sipas audituesve, mungojnë 12.597 kg bakër (në formën e shiritit e telit të bakrit); 4393 kg tel e lingota bronxi; si edhe 36.537 kg tunxh. KLSH ka përllogaritur shifrën totale të këtyre materialeve “të zhdukurua”, referuar vlerave të përdorura nga ankandet e zhvilluara gjatë të njëjtës periudhë nga Ministria e Mbrojtjes.
Bazuar në krahasimin e vlerave, rezulton se metalet “e zhdukura” nga Uzina Mekanike Poliçan arrijnë në shifrën e 250 milionë lekëve të vjetra.
Për këtë “zhdukje”, gishti i përgjegjësisë është drejtuar tek ish-drejtori i Uzinës Mekanike, Erjon Zylyftari, si edhe disa ish-vartës të tij.
Emri i Zylyftarit dhe të tjerëve janë evidentuar qartësisht në raportin e Kontrollit të Lartë të Shtetit. Por, duket se Prokuroria e Beratit, nuk ka vendosur ende të zbardhë këtë skandal të rëndë financiar, megjithëse ka tre vjet që thotë se po kryen hetime.
