Problemet e shëndetit mendor, mund të prekin këdo. Ekspertët e psikiatrisë theksojnë se gjendjet janë të shumta, nisur nga çrregullime të humorit, ankthit, depresionit apo deri tek sëmundje madhore siç është skizofrenia. Pranvera njihet si periudha kur të gjitha problemet e shëndetit mendor mund të përkeqësohen, por disa janë më të ndjeshme.
“Më të ndjeshëm janë personat me çrregullime bipolare, ata që janë gjendje manjakale sepse në peridhën e dimrit është faza depresive ndërsa me fillimin e pranverës mund të kalojnë në atë që quhet gjendja manjakale, e euforisë, e ngazëllimit, e hiperaktivitetit, e pagjumësisë, e veprimeve impulsive, të nxitura, e axhitimeve psiko-motor”, tha Irena Thoma, psikiatre.
Por pse pranvera njihet si stina e përkeqësimit të simptomave tek persona me probleme të shëndetit mendor?
“Zakonisht bëhet shkak rritja e ditës dhe ulja e orëve të natës dhe ndikimi i dritës së fortë”, tha ajo.
Mjekët psikiatër thonë se terapia dhe monitorimi i saj me rigorozitet është çelësi i suksesit që personat me probleme të shëndetit mendor të jenë të qetë.
“Për pacientët që vuajnë nga probleme të shëndetit mendor, dozat e medikamenteve në periudha të ndryshme dhe sidomos në pranverë duhet të monitorohen më nga afër. Nëse mjekohen në mënyrë të rregullt dhe monitorohen në mënyrë rigorozë, trajtimi dhe ecuria e sëmundjes do ketë pognozë të mire”, shton psikiatre Thoma.
Psikoedukimi është një proces i rëndësishëm që iu jep mundësinë personave që vuajnë nga bipolariteti të kuptojnë shenjat e hershme të ndryshimit të gjendjes, për të reaguar në kohë, dhe rregulluar dozat e medikamenteve psikotrope që përdorin./Euronews Albania
