Presidentja e Meksikës, Claudia Sheinbaum, deklaroi se vendi i saj ka pranuar pothuajse 39,000 emigrantë të deportuar nga SHBA-ja që kur Donald Trump u rikthye në Shtëpinë e Bardhë në janar.
Kjo është një rënie e ndjeshme krahasuar me vitin e kaluar, kur Meksika pranoi rreth 52,000 emigrantë të deportuar nga SHBA-ja gjatë periudhës shkurt-prill, nën administratën e Joe Biden.
Edhe duke marrë parasysh deportimet e SHBA-së drejt “Trekëndëshit të Veriut” të Amerikës së Jugut, Hondurasit, El Salvadorit dhe Guatemalës të cilat përbënin më shumë se gjysmën e të gjitha deportimeve në mars, duket se Trump është ende disi larg objektivit të tij për të larguar një milion njerëz në vit.
Regjistrimet publike tregojnë një rritje të zbatimit të ligjeve të emigracionit nën udhëheqjen e Trump, përfshirë një rënie të ndjeshme të kalimeve të paligjshme të kufirit dhe një shtim të arrestimeve të emigrantëve, por jo domosdoshmërisht të numrit të deportimeve.
Shtëpia e Bardhë deklaroi dje se është në rrugë të mbarë për të arritur objektivin vjetor të Trump, duke pretenduar se që nga inaugurimi janë deportuar 139,000 persona. Por ekspertët e emigracionit thonë se këto shifra nuk përputhen me të dhënat zyrtare.
Shërbimi i Imigracionit dhe Doganave të SHBA-së (ICE), i cili është i detyruar nga Kongresi të publikojë çdo dy javë informacion për ndalimet dhe deportimet, ka raportuar se janë larguar rreth 57,000 persona më pak se gjysma e shifrës së pretenduar nga Shtëpia e Bardhë.
