Johan Wadephul, një nga figurat më të spikatura të politikës së jashtme gjermane dhe një njohës i mirë i zhvillimeve në Ballkanin Perëndimor, pritet të marrë drejtimin e Ministrisë së Jashtme në qeverinë e re të drejtuar nga kancelari Friedrich Merz.
Ky emërim përfaqëson një kthesë të rëndësishme në diplomacinë europiane, duke rikthyer CDU-në në krye të politikës së jashtme gjermane pas më shumë se gjashtë dekadash.
Një mik i vërtetë i Shqipërisë dhe i rajonit, Wadephul ka treguar ndër vite një angazhim të palëkundur për mbështetjen e reformave demokratike, forcimin e institucioneve dhe procesin e integrimit europian të vendeve të Ballkanit Perëndimor. Ai njihet për qëndrimet e tij të qarta në favor të sundimit të ligjit, demokracisë funksionale dhe mbrojtjes së standardeve europiane në vendet e rajonit.
Në këtë kuadër, një nga marrëdhëniet më të rëndësishme të ndërtuara me politikën shqiptare është ajo me deputeten e Partisë Demokratike dhe kryetaren e Komisionit të Çështjeve Europiane në Kuvendin e Shqipërisë, Jorida Tabaku. E njohur për angazhimin e saj në mbrojtje të reformave dhe integrimit europian, Tabaku ka bashkëpunuar ngushtë me përfaqësues të lartë të CDU-së, përfshirë Wadephul, në nisma që kanë synuar forcimin e shtetit të së drejtës dhe rritjen e transparencës në proceset demokratike të vendit.
Marrëdhënia e ndërtuar mbi respektin e ndërsjellë dhe vlerat e përbashkëta e bën emërimin e Wadephul një lajm inkurajues për Shqipërinë dhe për të gjithë ata që besojnë tek e ardhmja europiane e vendit.
Në një moment kur procesi i integrimit kërkon aleatë të fortë dhe të përkushtuar në zemër të Europës, prania e një miku të Shqipërisë në drejtimin e diplomacisë gjermane përbën një mundësi të re për thellimin e bashkëpunimit mes dy vendeve dhe mbështetjen e mëtejshme të reformave të brendshme.
