Partizani do të ketë një mision të vështirë për ta fituar titullin, sepse pa shkuar ende në finale të “final four” duhet të shkurorëzojë kampionen në fuqi, Egnatian.
Trajneri Skënder Gega, pas shortit, nënvizoi se sfidat e kësaj faze janë të vështira:
“Shorti? Besoj se Egnatia është skuadra më e fortë e Superiores, përderisa e mbylli kampionatin e rregullt e para. Sidoqoftë, ‘final four’ është tjetër histori, kërkon tjetër qasje.
Një gjysmëfinale e tillë ka vlera të shumta, ndaj do të përgatitemi shumë mirë për ta përballuar sa më mirë. Rrogozhinasit janë kampionët në fuqi, kanë ritëm të mirë si skuadër, shumë potencial. Deri me datën 5 do të përgatitemi shumë për të bërë sa më mirë.
Kemi patur ulje dhe ngritje në këtë sezon, por këto janë të pashmangshme në futboll. Ky është Partizani, shpresoj t’i kem të gjithë lojtarët në 100% të formës për këtë gjysmëfinale.
E ardhmja ime? Partizani është mbi gjithçka, unë dhe lojtarët jemi vetëm elementë të tij. Unë besoj se edhe kundërshtari e vlerëson Partizanin, por gjithsesi kjo iu takon atyre”.
