Besa dhe Pogradeci do të luajnë një sfidë vendimtare në “play-off” të Kategorisë së Parë. Fituesi i këtij takimi përballet me Tiranën më pas, për të luajtur në Superiore gjatë sezonit të ardhshëm.
Kompanitë e basteve kanë ndarë koeficientët, ndërsa ndeshja do të nisë sot në orën 17:00. Besa konsiderohet favorite për të fituar në “Elbasan Arena”. Kavajasit kuotohen me koeficient që shkon deri 2.00.
Në anën tjetër, fitorja e Pogradecit brenda 90 minutave ka koeficient 2.8. Barazimi vlerësohet me koeficientin 3.70.
Në kampionatin e rregullt të Kategorisë së Parë, Besa e mbylli si vend i tretë dhe Pogradeci si vend i pestë. Kavajasit eleminuan para këtij takimi Apoloninë me barazim, ndërsa pogradecarët ia dolën me fitore përballë Burrelit.
Ndeshja e sotme duhet të njihet me një fitues, që në rast barazimi brenda 90 minutave, do të luhet shtesa apo do të goditen penalltitë.
