Ish-mbrojtësi i Spanjës dhe Barcelonës, Gerard Pique, dhe e dashura e tij prej tre vitesh, Clara Chia, raportohet se i kanë dhënë fund marrëdhënies së tyre.
Piqué, i cili u tërhoq nga futbolli në vitin 2022, ka qenë shpesh në qendër të vëmendjes për jetën e tij sentimentale, veçanërisht pas ndarjes nga këngëtarja kolumbiane Shakira, me të cilën ka dy fëmijë, shkruan DailyMail.
Sipas emisionit televiziv spanjoll “Vamos a ver”, të raportuar edhe nga Marca, gazetarja Adriana Dorronsoro ka konfirmuar se Piqué dhe Chia janë ndarë. Ajo shtoi se arsyet e ndarjes nuk janë ende të qarta, por se ka dëgjuar se mund të jenë përfshirë palë të treta.
Clara Chia, 26 vjeç, është 12 vite më e re se Piqué. “Kam konfirmimin se Gerard Piqué dhe Clara Chía janë ndarë dhe po hetoj pak më tej për arsyet, sepse po dëgjoj përfshirje nga persona të tjerë, edhe pse ende nuk ka qartësi të plotë”, ka thënë Dorronsoro.
Sipas saj, burimi i informacionit është shumë afër çiftit, ndërsa ajo nuk ka mundur të konfirmojë nëse shfaqja e fundit e Piqués në Miami me një grua me flokë të kuqe ka qenë arsyeja kryesore e ndarjes.
Chia punon në një kompani prodhimi për argëtim sportiv dhe çifti kishte postuar më parë shumë fotografi së bashku në rrjetet sociale. Piqué prej kohësh ndan jetën mes Barcelonës dhe Miamit, ku jetojnë edhe fëmijët e tij. Mediat spanjolle kanë raportuar se kjo “jetë e dyfishtë” ka qenë një pikë tensioni në marrëdhënien e tij me Chia.
Në qershor të vitit 2022, mes thashethemeve për tradhti pas 11 vitesh lidhje dhe dy fëmijëve – Milan (11) dhe Sasha (9) – Shakira njoftoi ndarjen nga Piqué. Këngëtarja 47-vjeçare që atëherë ka thumbuar ish-partnerin në këngët e saj, duke e përmendur edhe si “Voldemort”.
Në një intervistë për CNN në atë kohë, Piqué u shpreh: “Në fund, e vërteta ose çfarë ndodh, nuk tregohet gjithmonë ashtu siç është. Nuk mund ta kontrolloj këtë. Gjëja më e mirë është që jam i rrethuar nga njerëzit që dua – familja, miqtë, ata që më njohin vërtet. Ata dinë si jam dhe çfarë bëj, dhe kjo më jep shumë qetësi. Jam shumë i lumtur, kaloj mirë dhe ndjehem me fat. Kam pasur një jetë të privilegjuar – kam luajtur për klubin e zemrës sime për më shumë se 20 vite, kam fëmijë të mrekullueshëm, një familje të jashtëzakonshme dhe miq të vjetër që i kam ende nga shkolla”.
Në vitin 2022, gazeta spanjolle El Periódico raportoi se çifti kishte filluar të jetonte ndaras për disa javë pasi Piqué ishte përjashtuar nga shtëpia nga Shakira. Në media qarkulloi edhe një teori se këngëtarja kishte zbuluar tradhtinë e mundshme përmes një kavanozi reçel luleshtrydheje, i cili ishte konsumuar gjatë mungesës së saj – ndërkohë që vetëm Shakira e konsumonte atë lloj reçeli. Megjithatë, vetë këngëtarja e ka mohuar këtë histori më pas.
Në verën e vitit 2023, Piqué thuhet se ishte shpërngulur për të jetuar me Chia – në të njëjtën shtëpi ku kishte jetuar dikur me Shakirën kur ajo erdhi për herë të parë në Barcelonë. Por, mesa duket, edhe kjo lidhje ka përfunduar tashmë.
