Lëndimi në kyçin e këmbës së djathtë që pësoi Berat Gjimshiti në ndeshjen e Pashkëve ndaj Milanit është më pak serioz se sa u mendua fillimisht.
Mbrojtësi shqiptar, i dëmtuar gjatë një përplasjeje me Rafael Leao në “San Siro”, është rikthyer këtë mëngjes në stërvitje në qendrën stërvitore të Zingonias.
Ka shpresa të mëdha që ai të jetë gati për sfidën e së premtes mbrëma kundër Leçes në Bergamo. Nëse bashkohet me grupin edhe në seancën e pasdites së nesërme, Gjimshiti pritet të jetë nga minuta e parë në mbrojtje.
Në përballjen e së premtes, Atalanta do të synojë të marrë fitoren e tretë radhazi për të ruajtur vendin e tretë në Serie A, si një garanci për t’u kualifikuar në sesionin e ardhshëm të Champions League.
Aktualisht, Atalanta është 4 pikë larg Bolonjës së vendit të katërt dhe pesë nga Juventusi i vendit të pestë, por “Zonja e Vjetër” është me një ndeshje më pak.
Nga ana tjetër, Leçe do të luftojë për të marrë një fitore ose barazim pas 8 humbjeve dhe dy barazimeve me radhë.
Për ekipin marrja e të paktën një pike do të jetë shpresë për të qëndruar në serie a ku renditet në katër ekipet e fundit dhe ku e ndan vetëm një pikë nga vendi i parafundit.
