Vlera e dollarit amerikan ka rënë në nivelin më të ulët të regjistruar në më shumë se tre vjet, pas përplasjes së fundit të hapur të Trump me kreun e Bankës Federale në SHBA, Jerome Powell.
Indeksi i dollarit amerikan, që mat forcën e tij kundrejt një shporte monedhash kryesore botërore, u regjistrua në 98.4 në orët e vona të mëngjesit të së martës, duke shënuar rënien më të madhe që nga marsi i vitit 2022.
Në kushte normale, dollari amerikan shihet si një aset i sigurt gjatë trazirave ekonomike dhe politike. Por këtë herë, investitorët kanë treguar pasiguri për shkak të ndikimit të mundshëm që tarifat tregtare dhe rritja e borxhit publik mund të kenë mbi ekonominë amerikane.
Tensionet janë rritur ndjeshëm pasi presidenti Donald Trump sulmoi ashpër guvernatorin e Rezervës Federale, Jerome Powell, për refuzimin të këtij të fundit për të ulur normat e interesit. Në një deklaratë në rrjetet sociale, Trump e cilësoi Powell si “një dështak” dhe e akuzoi për mungesë reagimi ndaj sfidave ekonomike të vendit.
Trump kërkoi që Fed të ndërmarrë një ulje parandaluese të normave të interesit, duke paralajmëruar për një ngadalësim të mundshëm të ekonomisë nëse Powell nuk vepron menjëherë.
“Mund të ketë një ngadalësim të ekonomisë nëse ai nuk ul normat e interesit, tani,” – shkroi presidenti.
Këto deklarata kanë ndezur pasiguri në tregjet financiare, me një efekt të menjëhershëm në aksionet amerikane dhe vlerën e dollarit. Investitorët shqetësohen se përplasjet mes Shtëpisë së Bardhë dhe Rezervës Federale mund të çojnë në vendime të pamatura ose në ndërhyrje politike të drejtpërdrejta në politikat monetare.
Konfliktet mes Trump dhe Powell nuk janë të paprecedentë. Që prej fillimit të mandatit të tij, presidenti ka shprehur pakënaqësi të herëpashershme me qëndrimet e Fed, dhe më herët është raportuar se ka shqyrtuar edhe largimin e Powell nga detyra, një hap kontrovers nga pikëpamja ligjore dhe politike.
Ndërkohë, Powell ka paralajmëruar vazhdimisht se tarifat tregtare të vendosura nga administrata Trump mund të sjellin rritje çmimesh dhe ngadalësim ekonomik, duke rritur më tej tensionet me Shtëpinë e Bardhë.
