SPAK lëshoi ditën e sotme tre urdhërarreste për zyrtarë të Policisë Rrugore të Tiranës, të dyshuar si të përfshirë në korrupsion. Mes tyre është dhe Roven Zeka, që mban postin më të rëndësishëm në Policinë Rrugore, pasi është Shefi i Qarkullimit Rrugor në Tiranë.
Në momentin që përfaqësuesit e Agjencisë së Mbikqyrjes Policore dhe Agjentët e BKH-së shkuan për ta arrestuar, Zeka ka tentuar që të arratiset.
JOQ raporton se drejtori “këmbëshpejtë” është nisur me vrap, por gjatë tentativës është rrëzuar duke dëmtuar gjunjët. Në këtë moment agjentët e BKH-së e kanë arrestuar në flagrancë.
Urdhërarrest është lëshuar edhe për Sokol Novakun, që mban postin e shefit të Sektorit të Aksidenteve dhe për Edison Tabakun, Oficer i Policisë Gjyqësore.
Të gjithë të sipërpërmendurit janë të dyshuar si të përfshirë në korrupsion, pasi SPAK pretendon se janë konstatuar duke i marrë para një gruaje për të mbyllur një aksident.
Roven Zeka është një personazh i njohur në radhët e uniformave blu. Në vitin 2019 ai u vendos në qendër të kritikave pas publikimit të një fotoje, ku dukej teksa tërhiqte zvarrë një fëmijë që ishte varrur për kofanon e makinës së policisë për të kundërshtuar arrestimin e të atit, aq sa i theu dhe krahun.
Shefi i qarkullimit Roven Zeka “zhyti” Tiranën në kaos dhe trafik, nuk u shpërndau policëve detyrat
Zeka ka lënë pas një kaos në policinë rrugore. Mësohet se ai nuk ka shpërndarë detyrat e policëve dhe kjo është reflektuar në kaos dhe trafik në Tiranë.
Sipas të njëjtit burim policët e qarkullimit nuk dinë si të veprojnë dhe se ku të shpërndahen për të menaxhuar situatën në kryeqytet ndërsa shefi i tyre ka marrë arratinë.
Udhërarresti ndaj Zekës është lëshuar pas një denoncimi nga një qytetare e cila është shprehur se shefi i qarkullimit rrugorë së bashku me dy zyrtarë të tjerë të policisë i kanë kërkuar para për ti kthyer patentën. Zeka pretendon se është i pafajshëm dhe nuk ka pranuar të prangoset duke u larguar.
