Ticiana Kushi që jeton në Hawai në SHBA, denoncon Prokurorinë dhe Gjykatën e Beratit, pasi i kanë ngrirë llogaritë e një transaksioni, që ajo ka bërë në llogarinë e vjehrrit të saj.
“Në vitin 2022 unë kam bëtë një marrëveshje me zotërinë Andi Jubani. Ne kemi hapur një biznes në Hawai dhe pas disa kohësh që biznesi ka funksionuar midis nesh, kemi pasur disa mosmarrëveshje, për shkak se personi ka bërë disa veprime joligjore në Amerikë. Duke qenë se unë nuk kam pranuar të bëhem pjesë e kësaj skeme, e kam kundërshtuar dhe këtu kemi filluar një procedurë gjyqësore në Amerikë, një procedurë të gjatë për të cilën unë kërkoj të drejtën time, pasi jam mashtruar dhe akuzuar pa të drejtë”, thotë denoncuesja.
Historia ka nisur në Amerikë, ku çështja është në gjykim, por ortaku i saj shqiptar, Andi Jubani e ka kallëzuar për pastrim parash vjehrrin, për shkak të një transaksioni.
“Ky person pa të drejtë ka marrë çështjen nga Hawai dhe e ka zhvendosur drejt Shqipërisë. Këtë gjë ky person e ka bërë duke bllokuar llogarinë time personale dhe për më tepër që është duke përndjekur vjehrrin tim. Pra babain e bashkëshorti tim, gjë që është e padrejtë. Kemi shitur shtëpinë në Shqipëri dhe vjehrri im më ka kaluar gjithë vlerën e shtëpisë këtu në llogarinë time personale në Hawai. Unë e kam këtë shifër të paprekur për më shumë se një vit dhe së bashku me disa kursime të mia të vogla që kisha. Në momentin që kemi filluar procesin gjyqësor në Amerikë unë kam vendosur që t’i ktheja vjehrrit tim lekët mbrapsht me shpresën se ne do të blinim përsëri një shtëpi në Shqipëri dhe do vazhdonim me planet e familjes sonë.
Mirëpo ky person ka marrë vesh këtë informacion dhe në bashkëpunim me Prokurorinë e Beratit dhe me Gjykatën e Beratit këta kanë marrë një vendim të padrejtë, duke sekuestruar llogarinë bankare të vjehrrit tim. Procesi në Amerikë është duke vazhduar, mua Amerika nuk më ka prekur asnjë llogari. Ato lekët i kam pasur në llogarinë time, janë të paprekura dhe nuk kanë të bëjnë me biznesin absolutisht. Këto dokumentet e shitjes së shtëpisë ai i ka bërë më shumë se 3-4 herë si deklarim dhe janë prova solide, janë prova shumë të forta që për fat të keq Prokuroria e Beratit nuk do që t’i marrë parasysh”, shtoi më tej denoncuesja.
Procesi në Amerikë është duke vazhduar dhe Amerika nuk i ka prekur Ticianës asnjë llogari. Avokati Arben Llangozi e konsideron shkelje të rëndë, që vetëm me një kallëzim të bëhen sekuestro./tvkla
