Të mërkurën në mbrëmje, Real Madrid do të presë Arsenalin në “Santiago Bernabeu” në ndeshjen e kthimit për të përcaktuar gjysmëfinalistin e Champions League.
“DefensaCentral” raporton se Florentino Perez ka takuar lojtarët e Realit dhe ka një premtim për ta në rast se përmbysin humbjen 3-0 në “Emirates”. “Nëse fitoni dhe na kualifikoni për në gjysmëfinale, do të ketë një shpërblim të madh nga klubi”, mësohet të ketë thënë Perez.
Pavarësisht humbjes 3-0, optimizmi te kampi madrilen është i madh për të tentuar përmbysjen e madhe, gjë që nuk është hera e parë për një klub si Real Madrid.
Për të rritur akoma dhe më shumë motivimin e lojtarëve në fushë ka menduar dhe tifozeria e “Los Blancos” e cila do të ndërtojë një super koreografi dhe do të krijojë një atmosferë të zjarrtë, duke u mbledhur edhe jashtë stadiumit për të mirëpritur autobusin e ekipit dhe për të frymëzuar më shumë lojtarët.
