Partizani mposhti 1-0 Egnatian në një ndeshje shumë të rëndësishme për të kuqtë të cilët ende nuk e kanë të sigurt pjesëmarrjen në “Final Four”.
Ndeshja u vendos nga një 11-metërsh i kthyer në gol nga Albers Keko dhe pikërisht ky fragment i lojës është kritikuar nga trajneri i rrogozhinasve, Edlir Tetova.
Tetova, është shprehur i pakënaqur me arbitrimin në ndeshjen e sotme dhe me taktikën e zgjedhur nga Partizani që hoqi dorë nga futbolli përballë rrogozhinasve.
“Nuk e di që nëse në futboll ka statistikë zero gjuajtje në portë dhe fiton ekipi kundërshtar, loje efektive zero. Nuk e di çfarë lloj futbolli është ky. Zero fate.
Referuar arbitrimit? Patjetër, zero fare. Pas penalltisë, që nga penalltia, vetëm me penalltinë që nuk ka lidhje kjo. Ndaj kemi gjyqtarë në fushë, në momentin kur nuk bën lojë efektive, shtohet minuta, 20, 30, sa të shtrihen në tokë ata, jo katër minuta shtesë.
Normalisht që është pa raste se në momentin që kemi një ekip me bllok të ulët fare 6-3-1, e kishim parashikuar, duhet të luanim te linja e dytë. Por shumë pak e bëmë se 6 veta në linjë, edhe terreni kur ke topin nuk është se është i favorshëm që të luash shpejt dhe kjo ndihmon kundërshtarin”, tha Tetova për RTSH pas ndeshjes.
