Olta Gixhari ka ndarë mendimet e saj në Instagram në lidhje me finalen e “Big Brother VIP Albania 4”, ku në një përballje mes motrës së saj, Gerta Gixharit, dhe Rozana Radit, kjo e fundit siguroi një vend në finale.
Olta preku një dukuri që po bëhet gjithnjë e më prezente në rrjete sociale: mënyra se si publiku reagon ndaj fituesve dhe humbësve.
“Kam vënë re një fenomen të çuditshëm te rinia shqiptare. Pse them te rinia shqiptare? Sepse më së shumti ky lloj fenomeni, kaq i shpeshtë, ka filluar të ndodhë në rrjetet sociale. Kjo ‘bërtitje’, kjo revoltë e rinisë shqiptare, ndodh sepse ata që komentojnë janë shumë të rinj në moshë. Ndodh pikërisht në Instagram,” u shpreh ajo.
Më tej, Olta ngriti një pyetje: “Si ka mundësi që nuk jemi dakord me një fitues? Më bën shumë çudi. Në çdo garë, ai që fiton është ‘i keqi’, dhe ai që humb është ‘i miri’. Patjetër që po i referohem Big Brother-it.”
Duke marrë si shembull përballjen Gerta-Rozana, ajo shtoi: “Humbet Gerta, të gjithë bëhen me Gertën, si kurrë më parë. Jam shumë e lumtur për këtë. Por, Gerta nuk ka nevojë për zhurmë në Instagram, ka nevojë për vota. Dhe votimet tregonin një gjë tjetër. Pra, kjo zhurmë në Instagram, papritmas, nuk përkthehet në vota. Më vjen shumë keq për këtë, dhe mund t’ju numëroj disa raste të tjera krejt të kundërta.”
Më tej, ajo përmendi rastin e Eglit: “Ishte Egli në shtëpi: “Nuk e duam, nxirreni jashtë!”. Doli Egli: “U çua e gjithë Shqipëria: ‘Duam Eglin! Ktheni Eglin! Nuk ka kuptim loja pa Eglin!’”. U fut Egli: “Pse u fut? Nuk e donim!”.
Ajo vijoi me një thirrje të qartë për publikun: “Ju lutem, votoni! Vendosni kë doni në finale, por mos urreni atë që fiton. Ç’faj ka ai i shkretë që del fitues me votat tona?”
Olta u shpreh e shqetësuar se e njëjta gjë mund t’i ndodhë edhe Gertës. “Kam frikë se do ndodhë si me finalistët e tjerë. Gerta mund të fitojë përballë Eglit dhe më pas të urrehet. Do të thuhet: ‘Pse nuk fitoi Egli? Pse jo Danja?’”.
“Ne e duam shumë njëri-tjetrin kur e shohim të humbur, kur e shohim të dërrmuar, kur e shohim të trishtuar. Por kur shkëlqen, nuk e duam më. […] Dua që ta doni motrën time edhe kur të fitojë, jo vetëm kur të humbasë. Dua që ta doni dhe ta respektoni për atë që është, për mënyrën se si ka luajtur. Vota është shumë e rëndësishme, nuk janë zhurmat në Instagram,” përfundoi ajo.
