Bota madrilene kërkon fajtorët e humbjes 3-0 ndaj Arsenalit. Shumë nga kritikat drejtohen ndaj Ancelottit për mosmarrjen e vendimeve që kërkoi ndeshja.
Por sipas ish-lojtarit të Real Madrid, Guti, përgjegjësit për humbjen 3-0 të Los Blancos me Arsenalin në Londër janë yjet e sulmit.
“Lojtarët e Arsenalit donin të fitonin. E shprehën më shumë dëshirën për fitore. Madrilenët, jo”, ka thënë ish-mesfushori.
“Më të mirët duhet të tregojnë veten në ndeshjet më të rëndësishme të sezonit. Mbappe, Vinicius, Rodrygo, madje edhe Bellingham, nuk ishin aty për të marrë përgjegjësi”.
“Loja nuk është e ndarë: me top, pa top. Ndoshta me top shënon pesë gola, por nëse nuk shënon, mund të vraposh pafund dhe të kërkosh një gol”.
“Ancelotti ka super yje në skuadër. Nëse titullarët nuk bëjnë dot një gjë efikase, atëherë duhen provuar lojtarët e stolit, padiskutim”.- tha ai.
