Walid Jarmouni ishte heroi i Tiranës në derbin kundër Partizanit. Sulmuesi ia doli të shënonte dopietë në fitoren 3-0 që bardheblutë morën ndaj rivalit të tyre të përjetshëm, në sfidën që u zhvillua në “Arenën Kombëtare”.
Kjo dopietë e ngjit atë në listën e golashënuesve të këtij sezoni në Superiore. Tashmë ai ka arritur në kuotën e 12 golave, teksa ka vetëm 2 gola më pak se Bekim Balaj dhe Regi Lushkja, të cilët kryesojnë me nga 14 të tillë.
Kampionati shqiptarë tashmë siç dihet ka edhe 3 ndeshje drejt fundit dhe mbetet të shihet se si d të shkojë kjo garë për “Këpucën e Artë”. Duhet pranuar se pavarësisht se Jarmouni po “kërcënon” Balajn dhe Lushkjen në këtë garë mes tyre, më të avantazhuar mbeten sulmuesi shkodran dhe mesfushori i rrogozhinasve.
Kjo pasi ekipet e tyre ndodhen në “Final – Four” dhe kanë mundësinë të luajnë edhe 2 ndeshje më shumë për të përcaktuar edhe skuadrën që do të fitojë titullin kampion. Gjithsesi futbolli është plot me surpriza dhe mbetet të shihet se çfarë do të ndodhë deri në fund.
