Juventusi përballet me një tjetër pengesë të madhe në një moment kyç të sezonit. Mbrojtësi Federico Gatti ka pësuar një dëmtim serioz dhe do të qëndrojë jashtë fushave për të paktën një muaj.
Kjo do të thotë se ai do të humbasë disa përballje vendimtare në garën për një vend në Ligën e Kampionëve, duke nisur nga sfida e së dielës mbrëma kundër Romës, ndërsa në dyshim janë edhe ndeshjet në transfertë ndaj Bolognës dhe Lazios në fillim të majit.
Kjo situatë paraqet një problem të madh për trajnerin e sapoemëruar Igor Tudor, i cili preferon një skemë me tre qendërmbrojtës. Aktualisht, ai ka në dispozicion vetëm tre lojtarë për këto pozita: Kalulu në të djathtë, Veiga në qendër dhe Kelly në të majtë.
Alternativat janë shumë të kufizuara: Savona nga skuadra e Next Gen, i cili ka luajtur në të djathtë në një mbrojtje me tre, si dhe Manuel Locatelli, që mund të tërhiqet në prapavijë, një zgjidhje që është eksperimentuar edhe më herët këtë sezon nga Thiago Motta.
Për të mbushur boshllëkun, Tudor ka ftuar në stërvitje Javier Gil Puche nga skuadra e Next Gen, që garon në Serie C. Qendërmbrojtësi spanjoll 19-vjeçar pritet të grumbullohet me skuadrën e parë për një periudhë të pacaktuar, të paktën deri në rikthimin e Gattit.
Situata në repartin defensiv është delikate dhe drejtuesit shpresojnë që infermieria të mos mbushet më shumë në këtë fazë delikate të sezonit. Juventusit i duhet të improvizojë, por edhe të shpresojë që të mos humbasë më shumë elementë kyç në këtë sprint final për objektivat sezonalë.
